BAGUIO CITY – Patien ni Baguio City Mayor Mauricio Domogan a saan a rumbeng a babalawen ti publiko ti presensia dagiti artista wenno dagiti modelo kadagiti floats a maiparada iti Grand Float Parade a maysa a highlight ti Panagbenga.
Reaksion daytoy ti mayor kalpasan a binabalaw ti maysa nga artist ti presensia dagiti artista kadagiti floats.
Sigun iti nasao nga artist, imbes a ti disenyo ti float ti maapresiar dagiti agbuya ket maipapaayan iti dakdakkel nga atension dagiti artista wenno dagiti modelo.
Inlawlawag ti mayor a paset ti presentasyon ken creativity dagiti floats dagiti artista nga aglugan kadagitoy ken makatulong daytoy tapnu ad-adda a maguyuguy ti publiko nga agbuya iti Grand Float Parade.
Kinunana a nagbalinen a kaugalian iti tinawen a pannakarambak ti Panagbenga ti pannakipaset iti daytoy dagiti artista ken modelo.
Innayonna a daydaywen dagiti sangaili ti Grand Float Parade saan laeng a tapnu kitaen dagiti artista ngem ketdi, tapnu buyaen ti disenyo ti tunggal float ken no anya a klase ti sabong ti naaramat kadagitoy.
Maangay ti Grand Float Parade inton Pebrero 25 a mangrugi iti Upper Session Road ken agleppas iti Melvin Jones Football Grounds.
