BAGUIO CITY – Nagtalinaed a napintas ti occupancy rate kadagiti hotels ken panganan ditoy Baguio iti baet ti kanayon a panagtudo a mapaspasaran iti siudad.
Iti panakiyuman ti Bombo Radyo kenni Andrew Pinero, media relations officer ti Hotel and Restaurant Association of Baguio, makapaklaat gaputa arigna awan pakibiang dagiti turista iti saan a nasayaat a panawen kadagiti napalpalabas a lawas gaputa agtultuloy ti panagsangpetda ditoy Baguio.
Kinunana nga iti napalabas a weekend ket arigna saan a makaidna dagiti stakeholders iti hospitality industry ken pampanunutenda dagiti rason no apay nga agtultuloy ti panagsangpet dagiti turista iti baet ti matutudo a panawen.
Dinakamatna a ti kadawyan nga occupancy rate kadagiti hotels ket dumanon iti 90 agingga 100 ken daytoy ket napintas a sinyales nga awanen ti maibagbaga a ‘lean season’ ditoy siudad no isyu ti turismo ti pagsasaritaan.
Innayon ni Pinero a saan a lapped ti kasasaad ti nalatak a Kennon Road tapnu malapdan dagiti turista iti panagturongda ditoy City of Pines tapnu nanamenda ti nalammiis a panawen.
