BAGUIO CITY – Maiwaragawag inton Oktobre ti resulta ti naipatungpal a panagadal iti lebel ti mercury iti buok dagiti pocket miners wenno small scale miners iti rehion Cordillera.
Insayangkat ni Dr. Raymundo Rubillos manipud iti Philippine National Health Research System ti panaka-eksamin ti buok dagiti pocket miners wenno small scale miners iti rehiyon tapnu maamuan ti epekto ti panagaramat dagiti nasao a minero iti mercury.
Kinunana a nakompleton ti nasao a panagadal ken ditoy a napaneknekan a sumagmamanon kadagiti pocket miners ti kontaminado iti mercury.
Sigun kenkuana, nagduduma laeng ti kakaro wenno lebel ti mercury iti buok dagiti pocket miners gaputa nagduduma met ti kabayag ti panaka-expose wenno panagaramat dagitoy ti mercury.
Innayonna a ti resulta ti panagadalda ket mabalin nga aramaten dagiti mammanday-linteg iti panangbukel dagitoy iti linteg wenno polisiya seknan iti panagaramat ti mercury.
Maipalagip a maikamkampanya ditoy rehion ti naan-anay a panakaipawil ti mercury nangruna iti panagminas gapu iti dakes nga epektona iti aglawlaw ken kadagiti agar-aramat iti daytoy.
Maar-armat ti mercury iti produksion ti balitok.
