Impetteng ti Malacañang nga awan ti pagdandanagan ni President Ferdinand Marcos Jr. seknan iti impeachment complaint a naipila kontra kenkuana.
Sigun kenni Communications Undersecretary Claire Castro, saan a madanagan ti presidente agsipudta ammona nga awan ti inaramidna nga impeachable offense.
Innayon daytoy a kompiansa ti Presidente nga awan ti inaramidna a dakes.
Impetteng ni Castro nga agtartrabaho ni President Marcos Jr. a maitunos iti Konstitusion ken maitunos iti linteg.
Maipalagip a naipila ti kaunaan nga impeachment case kontra kenni President Marcos Jr. gapu iti maatap a graft and corruption, culpable violation of the Constitution, ken betrayal of public trust.