Impeksa ni President Ferdinand Marcos Jr. ti panggepna a mangpauneg iti bilateral relations iti nagbaetan ti Pilipinas ken Saudi Arabia, a pagnanaedan ken pangpanggedan ti maysa a milion a Pilipino.
Kabayatan ti farewell call ni Saudi Arabia Ambassador Hisham Sultan Abdullah Alqahtani, kinuna ni President Marcos a ”produktibo unay” ti tour of duty ni Alqahtani iti Pilipinas.
Impaganetget ni President Marcos ti nasayaat a “partnership” a naaramid iti nagbaetan dagiti dua a pagilian.
Binigbigna pay ti takder ti Saudi Arabia iti Organization of Islamic Cooperation (OIC), a sigun kenkuana ket makatulong iti kappia idiay Mindanao.
Kabayatanna, binigbig met ni Alqahtani dagiti Pilipino gaputa paset dagitoy iti panagdur-as ti Saudi Arabia nangruna iti napalabas nga uppat a pulo a tawen.
Sigun kenkuana, saanna a malipatan dagitoy.
Ken kas paset ti panagsagana ti Saudi Arabia iti panangsangaili ti FIFA World Cup inton 2034,kinuna ni Alqahtani nga agkasapulan ti pagilianda ti Filipino workers para kadagiti proyekto ti riles kasta met para kadagiti dadakkel a proyekto iti Jeddah ken iti amianan a rehion ti pagilian.
Gapu iti dayta,impasigurado met ni President Marcos Jr a mangibaonda kadagiti skilled workers la kitdi adda ti bakante a panggedan sadiay.
