Kiniddaw ni Bayan Muna chairperson Neri Colmenares idi kalman nga agtalinaed ni President Ferdinand Marcos Jr. kas maysa a “respondent” iti petision kontra iti pannakaiyakar ti sobra a pondo ti Philippine Health Insurance Corporation (PhilHealth) iti National Treasury.
Nagapela daytoy kas sungbat iti mosion nga impila ti Office of the Solicitor General nga ikkaten ti presidente manipod iti petision.
Inkalintegan ni Colmenares a ti pannakawayawaya ni President Marcos iti kaso ket maysa a jurisprudential imbes a “constitutional issue.”
Dagiti “respondents” gamin ni Colmenares iti petisionna ket ni President Marcos, ti Senado, ken ti House of Representatives.
Inkalintegan ni Colmenares a rumbeng a ma-prosecute ni President Marcos gapu iti personal nga aramidna a panangsertipikar kas “urgent” ti pannakaipasa ti 2025 General Appropriations Act.
Inkalintegan pay ni Colmenares a ti pannakaprosecute ni President Marcos iti petision ket saan a manglapped kenkuana a mangaramid iti trabahona ken saan met a ma-harass.
Iti agdama, awan pay ti komento ti Malakanyang iti nasao a banag.
