Kinumpirmar iti Malacañang nga impaayan ni President Ferdinand “Bongbong” Marcos Jr. iti pammalubos ti Bureau of Internal Revenue (BIR) a luktan ti tax records ni Vice President Sara Duterte ken ti rekord ti asawana a ni Atty. Manases Carpio kas panagsurot iti proseso iti linteg.
Sigun kenni Palace Press Officer Undersecretary Claire Castro, saan a nagkedked iti Presidente iti panagaprobar nu kasapulan daytoy tapno mairuar ti kinapudno.
Ti statement ket kasaruno iti panangisubmitir iti Bureau of Internal Revenue iti tax records ni Duterte iti Senate impeachment court kas sungbat iti subpoena seknan iti impeachment trial.
Kabayatanna, nagkedked met a mangipaay iti komento ni defense spokesperson Atty. Michael Poa.
Idi napalabas a lawas, nangiruar ti impeachment court kadagiti subpoena para iti tax ken bank records ni Duterte a naipaay iti Bureau of Internal Revenue, Anti-Money Laundering Council, ken sumagmamano a bangko.
