Nakasagana ni President Ferdinand Marcos Jr. a mangsertipikar kas urgent ti maisingasing tax reform package ken ti pannakamyendar ti Electric Power Industry Reform Act (EPIRA).
Iti maysa a press briefing sadiay Malacañang, kinuna ni Palace Press Officer Atty. Claire Castro a sertipikaren ti Presidente dagiti gakat iti kanito a maiparang kenkuana.
Impaganetget ni Atty. Castro a saan a dakanaten ni President Marcos Jr. ti maipapan iti daytoy no awan ti nakaibatayanna ken nainget nga ad-adalenna ti tunggal sasao daytoy.
Maipalagip nga inwaragawag ti presidente iti maikalima nga State of the Nation Address (SONA) daytoy a panggepna nga ikkaten ti systems loss iti koriente, pannakaipangato ti tax exemption para kadagiti indibidual, ken ti pannakaikkat ti corporate income tax kadagiti babassit a negosio iti pagilian.
