Naituding nga agturong ni Kalookan Bishop Pablo Virgilio Cardinal David, president ti Catholic Bishops’ Conference of the Philippines, inton bigat, Huebes, idiay Rome.
Manamnama nga agturong idiay Rome dagiti amin a kardinal manipod iti intero a lubong para iti pumpon ni Pope Francis.
Mangisayangkatda pay iti “general congregations” wenno agsasaruno a “meeting” ken agsaganada iti pannakabutos ti baro a Santo Papa.
Tallo a Pilipino a kardinal ti maikari a makipaset iti papal election: da Luis Antonio Tagle, Jose Advincula, ken David.
Idi laeng kalman, impakaammo ti Vatican a maangay ti serbisio ti pumpon inton Sabado idiay St. Peter’s Square.
Iti testamentona, kiniddaw ni Pope Francis a maitabon iti simple, saan a naarkosan a tanem iti uneg ti patpatgenna a Roman basilica, ti Santa Maria Maggiore.
