Kidkiddawen ti presidente ti Catholic Bishops’ Conference of the Philippines a ni Bishop Pablo Virgilio Cardinal David, kadagiti papadi nga agmisada para iti agnanayon a panaginana ti kararua ni Pope Francis, ken inayonda ti Prayer of the Faithful iti misa para iti Santo Papa.
Ni Pope Francis ket pimmusay laeng idi kalman ti agsapa idiay Vatican.
Maguyguyugoy pay dagiti matalek a Katoliko a mangsindi iti kandila para kenni Pope Francis ken agkararag iti agnanayon a panaginana.
Kiniddaw pay ni Cardinal David kadagiti matalek a Katoliko nga ibagada ti partikular a kararag a mabasa iti social media para iti pimmusay a Santo Papa kagiddan ti panagsindida ti kandila para kenkuana.
Immunan nga inawagan ni David dagiti simbaan iti intero a pagilian nga iyunida wenno batangtangen dagiti kampana para kenni Pope Francis.
Maipalagip nga itay laeng nabiit, ni Pope Francis nga agtawen ti walo pulo ket walo ket nagsagrap ti double pneumonia a nangitunda ti pannakaospitalna iti sumagmamano a lawas.
Ni Pope Francis ket naipasngay idiay Buenos Aires, Argentina.
Napili isuna kas successor idi pimmusay ni Pope Benedict XVI idi tawen 2013.
