Kinumpirmar ni Commission on Elections (Comelec) Chairman Atty. George Erwin Garcia a kitkitaenda metlaeng ti presidential ken vice presidential candidates iti 2022 elections nu adda dagiti immawat iti donasyon manipod kadagiti kontraktor.
Sigun kenni Atty. Garcia, manarimaan paylaeng ti panangkumpirmarda iti Department of Public Works and Highways (DPWH) nu adda iti kontrata sakbay, kabayatan, ken kalpasan iti panangipila dagiti kandidato iti Certificate of Candidacy dagitoy gapu ta kasapulanda pay a paneknekan nu public works contractor dagiti nangipaay iti donasyon.
Inlawlawag ni Atty. Garcia nga nu pribado a kontraktor dagiti maduktalanda a nangipaay iti donasyon, awan iti rumbeng a pagsaritaan.
Maibasar iti Omnibus Election Code, maiparit ti kontribusyon manipod kadagiti natural ken juridical a tattao nga agig-iggem iti contracts wenno sub-contracts a mangsuplay iti gobyerno iti goods, mangipaay iti serbisyo, wenno mangipatungpal ti konstrukyon.
Impanamnama ti dadaulo iti poll body nga iwaragawagda ti nagnagan dagiti public works contractors apaman a makumpirmarda dagitoy.
