BAGUIO CITY – Ngimmato iti 5% agingga 7% ti presyo dagiti konstruksyon materials partikular ti deforms steel bar ditoy lokalidad iti agdama a tawen nu idilig idi napan a tawen.
Sigun kenni Department of Trade and Industry – Baguio-Benguet Provincial Director Atty. Samuel Gallardo, dakkel ti demand ti nasao a materyal iti sangalubongan rason ti panagngato ti presyo daytoy.
Nupay kasta, kinunana a bimmaba met ti presyo ti semento iti P20 isut gapuna magatang iti P215 ti tunggal bag manipud iti P240 a presyo daytoy idi napalabas a tawen.
Innayonna a saan a mabaliwan ti presyo dagiti basic neccessities kas ti can goods, gatas, kape ken daduma pay.
Imbinglayna metlawng a regular ti panagwanawanda kadagiti presyo ken suplay dagiti produkto a mailaklako iti probinsiya ti Benguet tapnu masigurado a sursuruten dagiti negosyante ti price standard wenno naituding a presyo dagitoy.
Inlawlawag pay ni Atty. Gallardo nga ammoenda amin ti presyo dagiti magatgatang a produkto tapnu maadalda a nalaing ti pagbaliwan ti presyo dagitoy nangruna ita panawen ti kalamidad.