BAGUIO CITY – Agtaltalinaed a nababa ti presyo dagiti nateng, partikular ti wholesale price iti La Trinidad Vegetable Trading Post sadiay La Trinidad, Benguet.
Iti interview ti Bombo Radyo Baguio, kinuna ni Agot Balanoy, panakabagi ti liga dagiti asosasyon iti nasao a trading area nga adu ti suplay ti nateng ita sadiay.
Kinunana nga iti baet daytoy ket pagyamyamananda nga adda latta dagiti gumatgatang kadagiti nateng nupay adda dagiti magatang iti below cost of production ken adda met dagiti magatang iti above cost of production.
Inlawlawagna a maysa a rason iti panagbabab ti presyo dagiti highland vegetables ket ti panagbaba ti demand gapu iti nalimitaran a panaggaraw kadagiti dadduma a paset ti pagilian a naka-apektar kadagiti aktibidad ken iti panaggaraw ti ekonomiya.
Dinakamatna a ninamnamadan nga iti panagsubli dagiti limitasyon gapu iti community quarantine ket maksayan ti demand ti nateng ken maapektaran dagiti mannalon.
Nupay kasta, pagyamyamananda ti kampanya ti Department of Agriculture tapnu matulongan ti panakailako dagiti nateng dagiti mannalon babaen iti KADIWA Market a mailuklukat kadagiti nagduduma a lugar ken pakailaklakuan dagiti produkto dagiti mannalon iti Benguet ken Mountain Province.
ni Agot Balanoy, panakabagi ti liga dagiti asosasyon iti La Trinidad Vegetable Trading Post
