BAGUIO CITY – Nagtriple ti presyo dagiti nalabaga a rosas a mailaklako ditoy siudad ti Baguio kagiddan ti umadani a Valentines Day.
Segun kenni Estela Dumas, presidente dagiti cutflower vendors ditoy siudad, dumanon ita iti P500 ti presyo ti per bundle ti extra long red roses, P400 dagiti long stem red roses, P300 kadagiti medium, bayat a P200-P250 kadagiti short stem red roses.
Kinunana a nu kadagiti normal nga aldaw ket dumandanon laeng iti P150 per bundle ti presyo dagiti extra long red roses.
Innayunna met a ti tunggal pidaso ti medium ken long stem red rose ket aggatad iti P20-P25 ken manamnama nga agdoble ti presyo dagitoy inton Pebrero 12.
Kabayatanna, ti alstroemeria ket aggatad iti P10 tunggal dosena, P60-P80 ti malaysian mums, bayat a P30 ti tunggal bundle ti aster.
Kinunana pay a posible nga ad-adda a ngumato ti presyo dagiti sabong gaputa malaksid iti Valentines Day ket mapagsagsagnaan met laeng ti Grand Float Parade a maangay inton Pebrero 26.
