BAGUIO CITY – Ad-adda pay ngimmina dagiti rosas a mailaklako iti siudad ti Baguio ken sadiay La Trinidad, Benguet kagiddan ti pannakarambak ti Valentine’s Day ita nga aldaw.
Sigun kenni Estela Dumas, presidente dagiti cut-flower vendors sadiay Harisson Road, Baguio City, idi rabii ket aggatad iti P800 ti tunggal bouquet ti extra long stem a rosas, P700 ti bouquet ti long stem rose, P500 iti tunggal bouquet ti medium stem ken P300 aginggat P400 ti maysa a bouquet ti short stem roses.
Kinunana a posible a ngumato pay ti presio dagiti rosas ita nga aldaw depende iti demand ken suplay iti daytoy.
Kinunana a dagiti ar-aramidenda a rosas ket mabalin nga agbayag iti lima nga aldaw sakbay a malaylay la ketdi maiyuper daytoy iti danum.
Kabayatanna, kinuna ni Dumas a nanginngina dagiti rosas a mailaklako iti lowlands nangruna sadiay Metro Manila no idilig ditoy siudad ti Baguio.
Kinunana nga agarup 80 porsiento kadagiti sabong a mailaklako sadiay Manila ti nagtaud iti munisipio ti La Trinidad ken iti siudad ti Baguio.
