BAGUIO CITY – Bimmaba ti presyo ti bagas iti merkado publiko ti Baguio-Benguet iti agdama nu idilig idi napalpalabas a bulan a nangina.
Iti interview ti Bombo Radyo kenni Nicholas Medrano, Presidente ti Grains Retailers Confederation Philippines, napintas ti suplay ti bagas iti agdama gapu ta adu ti sumangsangpet a suplay manipud Isabela, Nueva Ecija, Pangasinan ken Tarlac.
Sigun kenni Medrano, awan ti makita na a panagbaba wenno panaggaraw pay ti presyo gapu ta nababa ti ani iti agdama nu idilig idi napalabas a tawen.
Innayona pay a dagiti importers ti mangipapaay iti presyo ti bagas nu sadino makaap-apektar daytoy iti ipaayda a presyo iti bagas nga ilaklako dagitoy.
Malaksid iti dayta, inlawlawagna a saanen a maka-stablize ti presyo ti National Food Authority nu idilig iti sigud a makaipapaayda ti suplay ti bagas kadagiti accredited outlet daytoy iti panawen a ngumatngato ti presyo ti nasao a produkto.
Iti agdama, ti presyo ti 25 kilos ti bagas a sumangsangpet iti siudad ket P1,150 agingga P1,200, bayat a dumanon iti P1,300 iti special rice.
Kabayatanna, kinuna ni Medrano a dakkel ti impact ti El Niño phenomenon kadagiti mannalon gapu ta agkurkurang ti suplay ti danum a makaap-apektar met iti apit ti pagay.//Bombo Marinel Rodrigo
