BAGUIO CITY–Bimmaba ti presyo iti amin a klase ti commercial rice iti merkado publiko ditoy syudad ti Baguio.
Ti panakiyuman ti Bombo Radyo kenni Aghelita Gayados, Presidente ti Public Market Rice Section, bimmaba iti P100 tunggal maysa a sako a katukad ti 60 kilos a commercial rice.
Iti agdama, dumanon laengen iti P44 ti tunggal kilo ti nasao a bagas nababbaba iti P2 nu idilig iti sigud a presyo a P46 tunggal kilo.
Kinunana nga adu ti suplay ti commercial iti merkado publiko a nagtaod kadagiti kabangibang nga ili kas iti Probinsya ti Pangasinan.
Kabayatanna, nilawlawaganna nga awan iti anyaman a kaso ti hoarding ti bagas ditoy syudad gapu ta babassit laeng ti bodega dagitoy isut gapu nga imposible a mangipatungpal ti hoarding dagiti distributors ti nasao a bagas.
Posible a bumaba pay ti presyo ti NFA rice iti merkado publiko inton sumangpet ti inangkat ti gobierno a bagas manipod iti ballasiw taaw.
Sigun kenni Aghelita Gayados, Presidente ti Public Market Rice Section, manamnama a bumaba ti presyo ti nasao a bagas nangruna nu sumangpet ti naiwaragawag a tone-tonelada a bagas ditoy pagilian.
Nupay kasta, kinunana a naksayan ti alokasyon ti NFA a naawat dagitoy manipod iti sigud a maawawatda a stocks.
Gapu iti daytoy, kinunana nga agtalinaed latta agingga lima kilos iti panakalimitar ti kilo ti bagas a gatangen ti maysa nga indibidual tapnu maipaayan amin nga agtarigagay a gumatang iti NFA rice.