Posible a mapasaran manen intun sumaruno a lawas ti sabali manen a panagngato ti presyo ti produkto a petrolyo gapu iti giera sadiay Middle East.
Maibasar iti forecast ti Mean of Platts Singapore (MOPS) trading iti napalabas nga uppat nga aldaw, posible a ngumato ti presio ti diesel iti P11 agingga iti P12 tunggal litro.
Gapu iti daytoy, posible a dumanon iti nagbaetan ti P118 agingga P146.3 tunggal litro ti presyo ti diesel kadagiti sumagmamano a gasolinaan iti pagilian.
Kabayatanna, posible nga awan ti panagbaliw ti presyo ti gasolina, ngem mabalin metlaeng a ngumato iti P3 tunggal litro a mabalin a mangitunda iti P115.4 a presyo tunggal litro.
Maipalagip nga immuna nga impasigurado ni President Ferdinand Marcos Jr. nga umdas ti suplay ti krudo iti pagilian agingga intun Hunyo 30, 2026.
Sigun kenni President Marcos Jr. agtultuloy ti panangsapol dagitoy iti kanayunan a pangangkatan ti pagilian iti petrolyo; tapno masigurado nga umdas ti suplay ti pagilian iti tengga ti agtultuloy a panagngato ti presyo iti world market.
