BAGUIO CITY – Bimmaba ti presyo dagiti karne ti baboy iti Baguio City Public Market nangrugi idi pay napalabas a lawas.
Sigun kenni Bong Alvar, dadaulo dagiti vendors iti meat section ti merkado publiko ti siudad, naksayan iti P20 ti presyo dagiti karne ti baboy manipud iti sigud a gatad dagitoy.
Kinunana a daytoy ket gaputa immado ti suplay ti karne ti baboy kadagiti pag-ang-angkatanda.
Nupay kasta, imbinglayna a bassit latta dagiti gumatgatang iti karne ti baboy iti baet a naksayan ti presyo daytoy.
Iti baet daytoy, mangnamnama latta dagiti meat vendors iti in-inot a panagbaba ti presyo dagiti karne ti baboy tapno umado dagiti kustomer dagitoy.
Iti kaudian a panagmonitor ti Bombo Radyo Baguio, magatang ti pork liempo iti P380 tunggal kilo manipud iti sigud a P400 bayat a ti pork grind ket magatang iti P370 tunggal kilo manipud iti sigud a P390 ken ti boneless ket magatang iti P370 tunggal kilo manipud iti sigud a P390.
Magatang met ti pork kasim iti P350 tunggal kilo manipud iti sigud a 370, ti pork pata iti P330 tunggal kilo manipud iti sigud a P350, ti pork loin iti P390 tunggal kilo manipud iti sigud a 400 ken ti pork liver iti P240 tunggal kilo.
