BAGUIO CITY – Manamnama a ngummato pay ti presyo dagiti sumagmamano a nateng kadagiti sumarsaruno a lawas gapu iti nagbalin nga epekto ti panagdalapos ti bagyo a Maring ditoy rehiyon Cordillera ita a lawas.
Iti interview ti Bombo Radyo Baguio, kinuna ni Frederick Edico, dadaulo ti trading operations ti Benguet Agri-Pinoy and Trading Center (BAPTC) a ngimmina idi agsapa dagiti sumagmamano a nateng, partikular dagiti leafy vegetables.
Kinunana nga agarup amin a nateng ket nakapasar ti dadael ngem kangrunaan kadagiti naapektaran dagiti leafy vegetables gaputa sensitibo dagitoy iti tudo.
Maipalagip nga iti datus ti Office of Civil Defense-Cordillera, nasurok iti P30.5-M ti inisyal a danyos kadagiti High Value Commercial Crops gapu iti bagyo a Maring.
