BAGUIO CITY – Temporaryo nga imparit ti lokal a gobyerno ti Baguio ti amin ken aniaman a pribado a panagtaripnong manipud ita nga aldaw, Enero 15 agingga inton tapos, Enero 31.
Gapu daytoy iti nangato a kaso ti COVID-19 iti siudad ken iti napartak a panagngato ti infection rate wenno panag-innakar.
Nailanad daytoy iti Executive Order No. 11, series of 2022 ni Mayor Benjamin Magalong.
Sigun kenkuana, adda ti pagkasapulan iti panakaimplementar ti kanayonan a restriction tapnu mapabuntog ti panagwaras ti virus ditoy siudad.
Patienna a ti panagngato ita ti kaso ti COVID-19 ditoy siudad ken ti kaadda ti community transmission ket ituntunda ti baro nga Omicron variant.
Innayonna a ti pammilin ket rekomendasyon dagiti health authorities kalpasan a naduktalan a dagiti panagtaripnong ti nagbalin a lugar iti panakaiwaras ti virus nangruna ta kaaduan kadagiti nakaptan iti COVID-19 ket addaan ti common history ti panagdar-ay ti pribado a panagu-urnong kabayatan ti holiday season.
Sigun kenkuana, nabigbig a dagiti close contact settings kas kadagiti pasken ken panagtataripnong ket risgo iti panakaiwaras ti COVID-19.
Impetteng pay dagiti health authorities a ti ugali dagiti tattao ti kadakkelan a rason iti panagwaras ti virus.
