BAGUIO CITY – Dakkel a pakaseknan ita dagiti fish vendors iti Baguio City Public Market ti agtultuloy a panagbaba ti mapaspastrekanda gapu iti limitado a bilang dagiti kustomerda.
Kagiddan daytoy ti naingetan manen a pagalagadan ditoy lokalidad gapu iti panakaipasidong ti Baguio iti General Community Quarantine agingga inton tapos, April 30.
Iti panagwanawan ti Bombo Radyo News Team, naamuan a bimmaba iti P10-P20 ti presyo dagiti lames ken ita ket magatang ti bangus iti P150-P160 tunggal kilo.
Magatang met ti galunggong iti P90 tunggal kagudwa a kilo, slice tuba a P190 tunggal kagudwa a kilo ken pasayan a P110 tunggal kagudwa a kilo.
Nupay kasta, agtaltalinaed latta a nangato ti presyo ti karne ti baboy ken ita ket magatang ti pork chop ken kasim iti P370 tunggal kilo, liempo ken pork loin iti P400 tunggal kilo, boneless iti P380 tunggal kilo, pork grind iti P390, pork pata iti P350 tunggal kilo ken pork liver iti P220 tunggal kilo.
Naamuan pay kadagiti pork vendors a bimmaba iti 40% ti demand ti baboy a rason iti panagtalinaed a nangato ti presyo daytoy.
