BAGUIO CITY – Naireklamo ti maysa a principal ti maysa a pribado a pagadalan ditoy siudad ti Baguio gapu iti mapapati a korapsion.
Maibasar iti reklamo, nag-practice teach iti nasao a pagadalan ti 12 nga estudyante manipud Tarlac idi napalabas a bulan ti Pebrero.
Nagkiddaw met ti pagadalan iti affiliation fee kadagiti student-teachers a normal a maisaysayangkat kas tulongda iti pagadalan a pakaipasidongdana iti practice teaching.
Nupay kasta, pinagbayad ti pagadalan dagiti nasao nga estudyante iti sag-P2,000 a nagresulta tapnu makaur-or ti pagadalan iti P24,000.
Naamuan a naipaayan dagiti 11 a mannursuro ti pagadalan iti sag-P500.
Iti baet daytoy, kidkiddawen ti complainant ti panakaiparang ti naka-aramatan ti nabatbati nga P18,000 manipud iti affiliation fee a binayadan dagiti student-teachers.
Sigun met iti DepEd-Baguio, ti school board ti nasao a pribado a pagadalan ti kasapulan a mangrisut iti reklamo nupay inaklonda a nangato unay ti gatad ti nakolektar nga affiliation fee.
Gapu iti daytoy, tarigagay ti ahensia ti panagpalawag ti nasao a principal kadagiti alegasyon kenkuana tapnu maamuan ti nakabusbosan ti P18,000 ken ti P3,000 a nabati iti napangabakan ti pagadalan iti nakipasetan dagitoy a pasalip.
Kabayatanna, nainget a pinaglibakan ti nasao a prinsipal ti alegasyon ken kinunana nga awan ti nakolkolektar a gatad manipud kadagiti estudyante.
Kinunana nga adda ti polisiyada nga agidonar dagiti estudyante iti sag-P2,000 kas tulong iti pagadalan dagitoy.
Dinakamatna a ti P24,000 a nakolektar ket pinagbibingayanda kadagiti mannursuro ken ti dakkel a gatad a naibati ket nailatang para iti pagadalan.
Impettengna a nailawlawag a naimbag kadagiti mannursuro no napanan ti nasao a gatad isut gapuna a nakalaat daytoy idi rimuar ti alegasyon.
