BAGUIO CITY – Nakasagana ti Benguet a maipasidong manen iti enhanced-community Quarantine iti kanito nga ibilin daytoy ti National Inter-Agency Task Force gapu iti agtultuloy a panagngato ti kaso ti COVID-19 iti probinsiya.
Sigun kenni Governor Melchor Diclas, awan ti agbalin a parikut nu maipasidong manen ti probinsiya ti Benguet iti naing-inget a lebel ti quarantine status gaputa pagsayaatan ti komunidad daytoy.
Kinunana a respetaren ken saan a tubngaren ti lokal a gobyerno ti agbalin a desisyon ti National Inter-Agency Task Force gaputa makatulong daytoy a manglimitar iti garaw dagiti tattao ken malapdan ti panagwaras ti COVID-19.
Iti agdama ket agtaltalinaed a naipasidong ti nasao a probinsiya iti General Community Quarantine ken sursurotenda paylaeng a dagiti pagaladan ti NIATF kas iti panag-irteng kadagiti social gatherings.
