BAGUIO CITY- Natalinaay latta ti sitwasyon ti linak ken kappia iti intero a probinsia ti Ifugao iti baet ti napasamak nga ingkwentro iti nagbaetan ti militar ken rebelde a grupo iti munisipyo ti Asipulo, Ifugao.
Iti interview ti Bombo Radyo Baguio kenni PLT. Lorna Butac, Public Information officer ti Ifugao Police Provincial Office, kinunana nga isolated case laeng ti napasamak nga ingkwentro iti nagbaetan ti Philippine Army ken dagiti miembro ti Communist Terrorist Group sadiay Namal, Asipulo.
Kinunana a manarimaan ti clearing operation iti napasamakan ti ingkwentro sadiay ken awanen ti mapaspasamak a rinnupak.
Agtultuloy met ti checkpoint nga ipatpatungpal dagiti otoridad iti nagduduma a lugar iti probinsia partikular iti Tinoc ken Kiangan nga asideg iti encounter site.
Agtaltalinaed pay dagiti nagbakwit nga 110 nga household wenno 463 nga indibidual sadiay Namal Elementary School ken Pula Barangay Hall.
