Saan pay a maipasidong iti Comelec control ti probinsya iti Abra iti agdama maitunos iti rekomendasyon iti security committee sigun kenni Commission on Elections Chairperson Atty. George Erwin Garcia.
Kagiddan dayta, imbinglay ni Atty. Garcia nga agtultuloy latta ti panangmonitorda iti daytoy nu sadino, na-activate itan ti Task Force iti nasao a probinsya a mangimaton iti kinatalged iti lugar mainaig iti umadanin nga eleksyon.
Maipalagip a kadagiti napan a lawas ket napasamak ti nagduduma nga insidente iti pammaltog a nakatayan dagiti daduma a karaman iti daytoy.
Kalpasan ti naobserbaran a panakaisardeng dagiti nasao nga insidente kabayatan iti Semana Santa, nailista manen ti baro a kaso idi Lunes ken Mierkules a nakatayan iti dua nga inibidwal.
