Nagun-od ti probinsya ti Benguet ti maika-sangapulo ket lima a pwesto iti kallepas a Batang Pinoy 2024 idiay Puerto Princesa, Palawan.
Daytoy a ranggo ti probinsya ket adayu a nangatngato nu idilig idi napalabas a tawen.
Maipalagip nga idi Batang Pinoy Competition 2023 ket rank 62 ti nasao a Probinsya.
Ita a tawen ket nakayawid dagitoy iti 61 a medalya nu sadino, 16 a gold medal, 12 a silver, ken 33 a bronze medal.
Iti pannakiuman ti Bombo Radyo kenni Marvin Sicomen, head coach ti kickboxing team iti probinsya ti Benguet, dakkel daytoy a balligi para iti nasao a probinsya.
Gapu iti dayta, namnamaen daytoy ti agtultuloy nga improvement iti tay-ak ti sports iti Benguet.
Agyamyaman met daytoy kadagiti indidibual ken organisasyon a nangipaay iti tulong pinansyal kadagiti nasao nga atleta a pakairamananda Benguet Board Member Marie Rose Fongwan Kepes, La Trinidad Mayor Romeo Salda, La Trinidad Vice Mayor Roderick Awingan, Team Lakay, ken Lion’s Nation Mixed Martial Arts.
Iti baet nga adda dagiti sumagmamano a timmulong kadagiti Benguet delegates, agkidkiddaw latta ni Sicomen iti naan-anay a suporta ti lokal a gobyerno para iti pannakaipaay iti pondo para kadagiti sports activities iti nasao a probinsya.
Maipalagip nga agarup dua gasut laeng nga atleta ti nakabiyahe paturong idiay Palawan tapnu makibalubal iti kallepas a Batang Pinoy, manipud iti agarup tallo gasut nga atleta a naituding a makibalubal para iti nasao a probinsya.
Nupay agkurkurang ti suporta ti lokal a gobyerno iti tay-ak ti sports, nakuna ni Sicomen nga ituloyda latta ti panag-ensayo dagiti atleta apaman nga agsubli dagitoy iti probinsya.
Sigun kenkuana, namnamaenna nga nu agtultuloy ti balligi nga iyawid dagiti atleta manipud iti probinsya, ditan met nga umado ti suporta nga ipaay ti lokal a gobyerno kadagiti Benguet athletes.//G
