Nabigbig ti probinsya ti Apayao kas maysa kadagiti sangapulo ket maysa a biosphere reserve nga indeklara ti United Nations Educational, Scientific and Cultural Organization (UNESCO).
Daytoy ket kabayatan ti maika-36th session ti International Coordinating Council of the Man and the Biopshere Programme a naangay idiay Agadir, Morocco itay nabiit.
Ti Apayao, ti “Last Frontier ti Cordillera” ti maikapat a biosphere reserve iti pagilian a Pilipinas nu sadino dagiti immuna a biosphere reserve ket ti Palawan, ti Puerto Galera idiay Oriental Mindoro ken ti Albay idiay Bicol.
Dakkel ti panagyaman ti probinsya ti Apayao iti nasao a pammadayaw, mangipakpakita iti kinapintas ti aglawlaw iti nasao a probinsya.
Tawen 2018 idi pinanggep ti Apayao a mairaman iti biosphere reserve kalpasan a naduktalanda ti aktibo a nest ti Philippine Eagle sadiay.
Collaborative effort met ti impatungpal ti local government unit, Philippine Eagle Foundation ken Department of Environment and Natural Resources para iti nasao a pakabigbigan.
Kabayatanna, dagiti dadduma a naideklara kas biosphere reserve ket manipud Belgium, Gambia, Colombia, Dominican Republic, Italy, Mongolia, Netherlands, South Korea, Slovenia, ken Spain.
