Nakasaganan ti Tourism Office ti probinsya ti Benguet iti mapadpadaanan a panagbisita dagiti ado a turista kabayatan ti summer vacation wenno iti semana santa.
Iti panakiuman ti Bombo Radyo kenni Eleazar B. Carias, Provincial Chief Tourism Officer ti Benguet, kinunana a nangipatungpal dagitoy iti monitoring kasta met a nagaramidda kadagiti protocol ken guidelines nga aramatenda tapno agbalin a naannayas ti biyahe dagiti turista.
Nupay kasta, nagpalagip ni Carias kadagiti turista nangruna kadagiti lowlanders a sakbayda nga agturong kadagiti nagduduma a tourist destination ti Benguet ket agresearch pay dagitoy, ammoenda no kasano ti terrain, no ayna ti papananda ken daduma pay.
Daytoy ket tapno saanda a marigatan kabayatan ti panagpasyarda.
Innayonna pay ti saan unay a panagrely kadagiti directional apps gapu ta mamingsan ken saan nga eksakto dagiti direksyon a maipapaay.
Gapu iti dayta, mas nasaysayaat a kontakenda wenno kasaritada dagiti Municipal tourism office a mabalin nga agirekomendar kadagiti daduma a destinasyon a mabalin a bisitaenda.
