![](https://img.bomboradyo.com/baguio/2020/07/66649241_466199147275911_7392616963937140736_n.jpg)
BAGUIO CITY–Saan latta a mapukaw ti inanama ti probinsiya ti Benguet a mangpataud kadagiti variety ti patatas para iti ad-ado pay a produksiyon dagiti mannalon.
Inwaragawag daytoy ni Governor Melchor Diclas kagiddan ti panangkunana nga agtultuloy latta ti panagadal ti Department of Agriculture-Cordillera ken dagiti maseknan nga opisina tapno mapaado pay ti produksion ti de-kalidad a patatas iti probinsiya.
Inaklona nga iti agdama ket makuna a saan paylaeng a kwalipikado para iti commercial production ti klase ti patatas nga imulmula dagiti mannalon sadiay Benguet.
Dinakamatna a kadawyan a mula a patatas iti probinsia ket addaan ti nangato a hydration wenno danum a saan a maiyannatop nga aramaten dagiti fast food chains.
Nupay kasta, impanamnama ti gobernador a babaen iti agtultuloy nga eksperimento dagiti maseknan nga ahensia ket mapataud iti probinsiya ti napimpintas a kalidad ti patatas ken addaan nabbabababa a hydration.
Impannakelna met a naballigi ti umuna trial ti panakaimula ti kalse ti patatas a nagtaud sadiay Canada a naimula sadiay Buguias ken Mankayan.
Maipalagip a rinuguian daydi sigud a Benguet Governor ken Congressman Nestor Fongwan Sr. ti inisyatibo a panagmula kadagiti de-kalidad a patatas para iti ekonomiya ti probinsiya ken mangtulong kadagiti mannalon.