Madanagan ti Bureau of Fisheries and Aquatic Resources (BFAR) sadiay probinsia ti Kalinga gapu iti bumasbassit a produksion ti heirloom rice.
Kasaruno ti naduktalan dagiti kameng ti nasao nga ahensia a kaaduan kadagiti upland farmers ti mangpili nga agmula iti inbred seeds imbes a dagiti tradisional a barayti.
Sigun kadagiti kameng ti Bureau of Fisheries and Aquatic Resources (BFAR) , ti panagbaliw ti panagpili ket gapu iti libre nga inbred rice seeds a naited kadagiti mannalon agraman ti sumagmamano nga abono ken pestisidio.
Awan gamin ti maipapaay a tulong kadagiti mannalon nga agtaltalon iti heirloom rice.
Ti heirloom rice ket kadawyan a maimulmula iti makinngato a paset ti probinsia, partikular kadagiti ili ti Pasil, Lubuagan, ken Tinglayan, ken naipasa iti adu a kaputotan.
Napateg daytoy a tagilako iti lokal a kultura ti Kalinga, saan laeng a gapu iti ramanna ken ayamuomna nu saan pay ket gapu iti kinaandurna iti makakarit a kasasaad ti paniempo ti probinsia.
Agpegpeggad itan a mapukaw dagiti tradisional a barayti ti heirloom rice gaputa kaykayat ti kaaduan a mannalon ti agmula kadagiti “inbred type” gapu iti kinatalged ti ekonomia ken dakdakkel a ganansia iti ababa a panawen.
Sigun kenni BFAR Kalinga Provincial Fishery Officer Joyce Docyugen, dagiti sumagmamano a rason nu apay a nagbaliw ti imulmula dagiti mannalon ket gapu iti economic pressures nu sadinno, dagiti “inbreed” a kita ti bagas ket maapit kalpasan ti ababa a panawen ngem ti heirloom rice.
Kadawyan a ti heirloom rice ket maapit iti innem a bulan manipod iti panawen ti panagmula, bayat a ti inbred rice ket maapit kalpasan ti uppat a bulan.
Nupay kasta, mangnamnama ni Docyugen a marisut ti nasao a banag, ken impasigurado ti munisipyu ti Pasil ken Lubuagan a planoda a mapreserba dagiti baraytida a tawid babaen ti panaggatangda kadagiti bukel a diretso manipud kadagiti mannalonda kalpasan ti panagani.
Ti rason no apay a maparparikutan ti Bureau of Fisheries and Aquatic Resources (BFAR) iti bumasbassit a heirloom rice ket gaputa umad-adu ti upland loach, maysa a kita ti igat, kadagiti pagay a saan a maar-aramat dagiti pestisidio.
