BAGUIO CITY – Mangnamnama ti Baguio City Veterinary and Agriculture Office iti agtultuloy a panagdur-as ti panagtaraken ti rabbit wenno kuneho ditoy siudad.
Sigun kenni Dr. Bridgit Piok, dadaulo ti nasao nga opisina, urayenda laengen nga adda ti maisubli a pares ti kuneho manipod kadagiti 300 a benipisaryo nga immunan a nangiwarasanda kadagitoy.
Kinunana dumanon iti 1,800 a kuneho ti inwarasda kadagiti nasao a benipisaryo para iti kanayunan a pagbirukan dagitoy, nangruna dagiti naapektaran iti panakaipasardeng ti panagtaraken ti baboy ditoy siudad.
Dinakamatna a tunggal benipisaryo ket naipaayan ti innem a kuneho a buklen ti dua a lalaki a kuneho ken uppat a babai a kuneho nga agserbi a breeder iti uneg ti innem a bulan.
Innayonna a dagiti maisubli a kuneho ket maiwaras to met kadagiti interesado nga agtaraken.
Immunan nga inlawlawagna ni Dr. Piok a ti rabbit dispersal program ket programa ti lokal a gobyerno ti Baguio tapnu maguyugoy dagiti umili a makipaset iti rabbit production nangruna ta alternatibo daytoy iti karne ti baboy, baka ken manok.
