BAGUIO CITY – Pormalen a nangrugi ita nga aldaw ti ‘Project Puraw’ a maipatungpal iti uppat a barangay ti Quirino Hill, Baguio City babaen iti panangidaulo da Congressman Mark Go, Mayor Maurico Domogan, DOT Regional Director Maria Venuz Tan ken dadduma pay nga opisyal ti siudad ti Baguio.
Segun kenni Middle Quirno Hill Kapitan Ignacio Gallente, umuna a marugian ti nasao a proyekto iti barangay daytoy ken narugian metlaeng a mapintoran ti maysa a balay sadiay itay alas tres ti malem.
Kinunana pay a nangipaayen iti pammalubos dagiti umili sadiay para iti panakapintor dagiti babbalayda.
Innayona pay a naayat metlaeng dagitoy a mapintoran iti puraw ti babbalayda la ketdi maipatungpal met ti immunan a kiddaw dagitoy a makabilan iti porma wenno disenyo dagiti babbalayda kas iti ‘Ling-Ling-o’ a nalatak a pendant dagiti Cordilleran.
