Adadalen ita ti depensa ken prosekusyon nu sukatan dagitoy dagiti spokersperson da kasaruno iti desisyon ni Impeachment Court Presiding Officer Francis Escudero iti sub judice rule.
Inlawlawag ni Escudero a dagiti abogado manipud iti prosekusyon ken depensa nga aglabsing iti pagalagadan ti impeachment court ket dumalan iti public reprimand with admonition iti umuna a bilang. Agserbi daytoy kas final warning kadagiti aglabsing.
Kabayatanna, iti maikadua a bilang ti pananglabsing, mapatawan dagitoy iti multa a dumanon iti P30,000 ken maipawil dagitoy nga agsao, ag-object, wenno mang-eksamin kadagiti testigo.
Gapu iti daytoy, ikonkonsidera ita ti dua a benneg a mangdutok iti spokesperson a saan a karaman iti legal team dagitoy.
Impetteng iti maysa kadagiti spokesperson ti prosekusyon a ni private prosecutor Benjamin Tolosa a raemenda ti ruling ti presiding officer ken pagsaritaanda pay laeng daytoy.
Iti sabali a bangir, impetteng met ni defense counsel ken spokesperson Michael Poa a nalawag ti nagbalin a ruling ni Presiding Officer Escudero ken respetuenda daytoy.
Innayonna met a pagsaritaanda daytoy iti depensa. Nupay kasta, innaklon daytoy nga awan pay laeng ti mapanunotda a sumukat kas spokesperson ti depensa.
