Kinuwestionaran ti House trial panel ti killaat a panagbalw ti posisyon ti depensa kalpasan nga inmanugot dagitoy a malukatan ti selyado a kahon dagiti dokumento manipud iti Bureau of Internal Revenue (BIR) para iti umadani nga impeachment trial.
Sigun kenni House trial spokesperson Zia Alonto Adiong, nupay napintas nga addang daytoy tapno agtuloyen ti kaso, masdaaw latta dagitoy nu apay nga ita laeng nga inmanugot ti depensa ita nga umadanin ti pre-trial conference.
Maipalagip a kinontra ti depensa ti panangmarka ti nasao a kahon kas ebidensya iti impeachment trial kontra kenni VP Sara Duterte.
Kinuwestionaran pay ni Adiong ti kiddaw ti depensa a mangipatungpal pay ti maysa a nagsina nga executive session para laeng iti pananglukat ken panangmarka iti BIR box.
Nagbalaag daytoy a mabalin a mangitunda daytoy iti panangpabuntog iti pannakairuwar ti pre-trial order ken porma a panangrugi ti panagdengngeg.
Gapu iti daytoy, kiniddaw ti prosekusyon a liklikan dagiti anyaman a legal a rason tapno marugian metten ti panangilatag kadagiti ebidesya ken testigo inton Hulyo 6.
“If this was going to be the defense’s position all along, why wait until after the pre-trial conference to say so? If they were prepared to agree in principle to the opening of the BIR box, why oppose even the simple marking of the sealed box during the hearing?” sigun kenni Representative Adiong. //bombokaren.c.sapirao
