Kinidaw ti dagiti prosecutors ti Office of the Ombudsman iti Sandiganbayan Third Division nga isanod da ti desisyonda a pagpiyansaen ni sigud a Senator Ramon “Bong” Revilla, Jr. iti sangsangwen daytoy a malversaton seknan iti maatap a pakainaiganna iti ghost flood control project idiay Pandi, Bulacan.
Iti inpila dagitoy a Motion for Reconsideration idi kalman, kinuna ti prosekusyon a saan nga umdas ti basaran ti nagbalin a desisyon ti korte a saan a pampubliko a pundo ti maatap a naawat a kickback ti sigud a senador.
Impetteng pay dagitoy a ti panangawat pay laeng ti senador iti advance kickback, umdasen daytoy a mangipasimudaag iti pannakipasetna iti saan nga umdas a panangaramat ti pundo ti pagilian.
Maipalagip a temporaryo a nawaya-wayaan ni Revilla idi Hulyo 31 kalpasan nga agdesisyon ti mayorya ti Sandiganbayan Third Division a saan nga umdas ti ebidensya kontra iti kaso ti sigud a senador.
Kabayatanna, nangipila met ti Motion for Reconsideration dagiti co-perpetrators ni Revilla a da sigud a Department of Public Works and Highways (DPWH) Bulacan First District Engineer Jaypee Mendoza ken cashier a ni Christina Pineda kalpasan a saan a napatgan ti umuna a kiddawda a makapagpiyansa.
Sigun met kenni Third Division Clerk of Court Atty. Dennis Pukma, naipaayan ti lima nga aldaw ti prosekusyon ken depensa tapno mangisumitir iti komentoda seknan iti naipila a mosyon. //bombokaren.c.sapirao