Imbilin ni Department of Transportation acting Secretary Giovanni Lopez ti dagus a panakakanselar ti amin a protocol license plates dagiti opisyales iti nasao a departamento ken daduma pay a sangay daytoy.
Iti naipaiyulog a memorandum idi October 13, binilinna dagiti maseknan nga opisyales iti DOTr nga issurrenderda dagiti protocol plates dagitoy.
Kagiddan dayta, dinutukanna ti Land Transportation Office (LTO) nga idauloanda ti nasao a tignay tapno masigurado ti naan-anay a panagtulnog dagiti opisyales.
Kasta pay nga imparebyu ni Lopez dagiti probisyon iti Joint Administrative Order (JAO) 2024-001 ken ti panakaisumitir ti updated wenno kaudian nga inventory dagiti amin a protocol plates a nai-issue babaen iti nasao a direktiba.
Iti bileg metlaeng ti pammilin ni Lopez, maiparit ti panagaramat iti “wang-wang” kas kadagiti sirens, blinkers, ken daduma pay a signaling wenno flashing devices maitunos iti pammilin ni President Ferdinand Marcos Jr. a malimitaran laeng ti panakaaramat dagitoy kadagiti emergency responders.
Ti nasao a tignay ket paset ti panagregget ti nasao nga opisina nga itandudo ti disiplina iti kalsada ken risuten ti pakaseknan iti publiko maipapan iti maatap a panang-abuso dagiti opisyales iti gobyerno kadagiti espesyal a pribilehio dagitoy.
