BAGUIO CITY – Pormalen nga agtugaw ni PSSupt. Lyndon Mencio kas baro a dadaulo ti Benguet Police Provincial Office.
Kasaruno daytoy ti naangay a turn-over ceremony idi kalman para iti pannakasukat ni PSSupt. Florante Camuyot kas dadaulo ti Benguet PNP.
Ni PSSupt. Mencio a miembro ti PNPA Class of 1990 ket sigud a dadaulo ti intelligence unit ti regional command ti PNP-Southern Mindanao ken sigud pay a nagserbi iti PNP – Intelligence Group sadiay Camp Crame.
Maiyakar met ni PSSupt. Camuyot iti regional headquarters ti PNP – Cordillera kalpasan ti dua a tawen a panangidaulona iti Benguet PNP.
Kabayatanna, pormal met a nagtugaw kas provincial director ti Mt. Province PNP ni PSSupt. Allen Sumeg-ang Ocden kasukat ni PSSupt. Telio Lis-o.
Ni PSSupt. Ocden ket sigud nga officer-in-charge ti Navotas City Police Station ken daytoy ket tubo ti Bontoc, Mt. Province.
