BAGUIO CITY – Binabalaw ni Mayor Mauricio Domogan ti killaat a panaka-relieve wenno panakaikkat iti pwesto ni PSSupt. Ramil Saculles ti OIC-City Director ti Baguio City Police Office (BCPO) idi Biyernes.
Kinunana a kinabastos ti inaramid ti Philippine National Police gaputa saanda pay a nakikoordinar iti city government sakbayda nga inikkat ni Saculles.
Dinakamatna a naawatda laeng ti paka-ammo iti malem ti Biyernes isut gapuna a nadismayada iti napasamak.
Impettengna a nabagaan pay kuma daytoy iti sumagmamano nga aldaw sakbay a naikkat ti nasao a dadaulo ti BCPO nangruna ta napateg unay ti panakaiwanawan ti linak ken kappaa iti lokalidad.
Innayonna a saan daytoy nga agawat iti agtugaw kas OIC-City Director ti BCPO gaputa amin a nagtugaw a dadaulo ti pulisya ti siudad ket addaan iti status nga Officer in Charge.
Gapu iti daytoy, kiniddawna ti dagus a panangisumitir ti Police Regional Office Cordillera iti list of nominees tapnu adda ti pagpilyan ti Screening Committee iti maipatugaw a dadaulo ti BCPO.
Sinukatan ni PSSupt. Gerardo Umayao a sigud a dadaulo ti Station 2 ti Makati City Police Station ni Saculles ken naangay ti turnover ceremony idi kalman.
Mangisumitir met ni City Councilor Edgar Avila iti resolusyon iti City Council a mangipekpeksa iti panakadismaya ti lokal a gobyerno ti Baguio iti ‘unceremonious relief’ ni PSSupt. Saculles.
Nakadirekta ti resolusyon kenni Philippine National Police Chief PD General Oscar Albayalde.
Nailanad pay iti resolusyon ti panangimbitarda kadagiti opisyales ti Police Regional Office Cordillera tapnu agpalawag dagitoy iti City Council seknan iti proseso ti panakadutok ken panakaikkat ti maysa a City Director.
Sagudayen ti Republic Act 8551 wenno ti Philippine National Police Reform and Reorganization Act of 1998 a nasken nga aprobaran ti local chief executive wenno mayor ti panakasukat ti maysa a City Director wenno Chief of Police iti masakupan daytoy.
Maipalagip a ti lokal a gobyerno ti maysa kadagiti kangrunaan a mangipapaay iti pondo iti pulisya.
