[photo credit to the owner]
BAGUIO CITY – Napili ni Police Senior Superintendent Ramil Ladyong Saculles kas dadaulo ti Baguio City Police Office (BCPO) babaen iti screening committee a bukbuklen dagiti nagduduma nga stakeholders ti siudad.
Sigun kenni Mayor Mauricio Domogan, nagbalin nga unanimous ti pannakapili ni Saculles manipud iti uppat a kakadua daytoy a napagpilian nga agbalin a City Director.
Kinunana a nagbalin a kriteria ti 30% nga availability, 20% a program, 20 % iti implementation, ken 10 iti interview.
Iti resulta ti screening, immuna ni SSupt. Saculles, simmaruno ni PSSUpt. Edgar Allan Okubo, PSSupt. David Peredo ken ni PSSupt. Mark Pespes.
Kinuna ti mayor a nalalaing ken napipintas ti programa nga imparang dagiti amin a napagpilyan ngem nagbalin a bentahe ni Saculles ti panagserbi daytoy iti highly urbanize city kas iti siudad ti Baguio.
Kabayatanna, nagyaman met ni PSSupt. Ramil Saculles iti pannakapilina kas director ti BCPO.
Ibilbilangna a dakkel a dayaw ti talek nga impaay kenkuana ti nabukel nga screening committee, dagiti kameng ti media ken dagiti umili ti siudad.
Impanamnama ni Saculles nga ituloyna ken ad-adda pay a papintasenna dagiti programa a rinugianna manipud nagtugaw daytoy kas acting director ti BCPO idi Oktobre ti napalabas a tawen.
Maisumitir iti Police Regional Office Cordillera ti resulta ti naipatungpal nga screening iti agserbi a City Director ken ti PROCor ti mangkumpimar ti pannakapili ni Col. Saculles.
