BAGUIO CITY- Impetteng ni Honarable Mylen Yaranon ti Baguio City Councilor a kasapulan ti public consultation tapno maipakaammo ken maamuan ti takder dagiti umili iti siudad ti Baguio maipapan paylaeng iti mapangpanggep a panagutang ti siudad ti $50 million wenno katukad ti P2.8 billion para iti repair ken rehabilitation ti sewage treatment plant idiay North Sanitary Camp, Baguio City.
Iti interview ti Bombo Radyo kenkuana, kinunana a narigat ti agutang agsipud ta maapektaran ti publiko iti daytoy, gaputa manamnama a ngumato ti bayadan dagiti babalay iti water consumption-da ti 16%; business building ket manamnama a ngumato ti 18% bayat a ngumato met ti P100 ti bayadan dagiti turista kadagiti hotel a pagyananda kas environmental fee.
Gapu iti dayta, kidkiddawen ni Yaranon a nasken nga ilawlawag dagiti mangidagdagadag iti nasao a panggep ti rason no apay a kasapulan nga umutang iti baet nga adda ti pudno ti siudad ti Baguio.
Kabayatanna, impetteng ti nasao a councilor, a maur-uray paylaeng dagiti kopya dagiti ongoing projects, findings ken sungbat dagiti local government manipud iti Commission On Audit (COA) tapno maadal a nalaing no adda pay ti nabatbati a pundo ti siudad.
Innayon pay ni Yaranon, a kasapulan nga adda ti dadduma a solusyon iti daytoy tapno saanen a kasapulan nga umutang.
