BAGUIO CITY– Saan a pinaboran ni Baguio City Councilor Philian Weygan-Allan ti panangabak ti public-private partnership (PPP) a modality para iti panggep a rehabilitasyon ti Baguio City Public Market.
Iti interview ti Bombo Radyo iti opisyal, kinunana a nasaysayaat no agbalin a loan agreement ti pamay-an ti siudad para iti panakapapintas ti merkado publiko.
Dinakamatna a babaen iti daytoy nga iskima ket magarantiyaan ti pakaseknan dagiti market vendors ken iti publiko gaputa saan dagitoy a madiktaran kadagiti dadakkel a korporasyon a mang-develop iti merkado.
Maipalagip a nangabak ti PPP a modality para iti panakapapintas ti Baguio Public Market manipud iti government funded program through social equity ken ti loan scheme modality iti kaudian a taripnong ti konseho idi Lunes.
Maianaig iti daytoy, dumanon iti pito a konsehal ti pimmabor iti PPP Deal bayat nga uppat dagiti simmuportar iti government funded program through social equity ken tallo, pakairamanan ni Allan, ti nagbutos para iti loan scheme bayata a dua ti nagkedked a nagbutos.
Kinuwestionaran pay ti dadaulo ti Comittee on Market, Trade and Commerce, and Agriculture ti konseho ti 50 a tawen a kontrata dagiti pribado a sektor iti sidung ti PPP modality gaputa napaut unay ti nasao a bilang ti tawen sakbay a maipaima iti Baguio LGU ti nasao a merkado.
