Al-allukuyen ti Commission on Elections-Baguio dagiti umili tapno agparehistro dagitoyen sakbay ti naituding a deadline inton Setyembre trenta, iti agdama a tawen.
Daytoy ket tapno maliklikan ti atiddog a pila bayat ti maudi a lawas ti panagpaparehistro.
Maibasar iti datos ti dumanonen iti 15,000 a botante ti nakapagparehistro iti siudad manipud Pebrero a dose agingga ita nga aldaw.
Sigun kenni Commission on Elections-Baguio Election Officer Atty. John Paul Martin, namnamaenna a manayunan pay ti nasao a bilang agingga inton ngudo ti agdama a bulan.
Kabayatanna, dagiti agpangpanggep nga agparehistro, ken agalis iti pagbutusan ket mabalin laeng dagitoy nga agparehistro iti kadakkelan a mall iti siudad.
Kasapulan laeng a mangitugot iti Valid Identification Card, Birth Certificate ken dadduma pay.
Nakalukat dagitoy iti lunes agingga sabado manipud alas otso ti agsapa agingga alas singko ti malem.
