BAGUIO CITY – Aw-awisen ti lokal a gobierno ti siudad ti Baguio ti publiko a makipaset kadagiti aktibidad ti Earth Hour inton rabii.
Maangay inton alas siete ti rabii ti parada ken “dance of the gongs” manipud Upper Session Road a dumalan sadiay Abanao St. ken agleppas sadiay City Hall para iti pannakaiddep dagiti silaw.
Maipatungpal met laeng ti simple a programa sadiay City Hall ken ti naidumduma a programa dagiti Persons Deprived of Liberty sadiay Baguio City Jail.
Immunan nga inallukoy ni Mayor Mauricio Domogan dagiti umili a makikaykaysa iti panagsalimetmet iti enerhia babaen iti panangiddep dagitoy iti sumagmamano kadagiti silawda inton rabii uray iti las-ud laeng ti maysa nga oras.
Kabayatanna, inlawlawag met ti dadaulo ti City Environment and Parks Management Office (CEPMO) ti kaipapanan ti logo ti Earth Hour ita a tawen.
Sigun kenni Cordelia Lacsamana, ti numero a 60 ket mangipasimudaag iti innem a pulo a minutos a panakaiddep dagiti dadduma a silaw kadagiti pagtaengan, parke ken kalkalsada iti siudad bayat a ti plus sign iti ngato ti numero ket mangipasimudaag met iti kanayunan pay nga adbokasiya ti siudad.
Kinunana a malaksid iti pannakaiddep dagiti silaw ket karaman metlaeng iti adbokasiyada ti panagsalimetmet ti danum, panagmula ti kayo, park management ken integrated water resource management, air quality monitoring ken dadduma pay a programa a mangsalwad iti aglawlaw.
Impetteng ni Lacsamana a ti Earth Hour ket saan a simple laeng nga aktibidad ngem daytoy ket maysa a kampanya para iti pannakaital-o ti envoronmental ken global sustainability.
