Maal-allukoy ti publiko a makipaset iti umadanin a panakaisayangkat ti Strawberry Festival sadiay La Trinidad inton sumaruno a bulan.
Daytoy ket kalpasan a naisayangkat ti media launching itay napalabas.
Iti panakiuman ti Bombo Radyo kenni Councilor Belmer Elis, kinunana nga ado a surprisa ti maiparang iti publiko ita a tawen no sadino nasken nga abangan daytoy ti publiko.
Sigun kenni Elis, daytoy nga aktibidad ket mangrugi inton Marso a tres ita a tawen babaen iti “Strawberry lane opening ken ribbon cutting” ken Strawberry lane & Agro-fair.
Iti nasao a pyesta, mapadpadaanan ti aktibidad nga strawberry cake fest wenno ti panakabake ti kadakellan a cake wenno a maipaay iti publiko.
Kabayatanna, maysa pay a mapadpadaanan nga aktibidad iti daytoy ket ti street dancing ken ti cultural parade a mapasamak inton Marso baente dos.
Malaksid iti dayta, maisayangkat met laeng dagiti aktibidad a ” Search for the heaviest and sweetest strawberries,” “Owik Tan Tayao at Multi-cultural celebrations,” Search for Mr. & Ms. La Trinidad ken daduma pay.
Naituding met nga agleppas ti Strawberry Festival inton Marso baente otso.
Para ita a tawen, addaan daytoy iti tema a “Semek La Trinidad,” a kayatna a sawen a “Love La Trinidad.”//Bombo Mera Pacpacan
