BAGUIO CITY – Maaw-awis ti publiko a makipaset iti maika-siyam a fishing tournament iti Baguio City a maangay inton February 15, 2025 idiay Burnham Lake.
Dagiti interesado a makipaset iti daytoy ket masapol a makikoordinar kenni Rafael Serrano, organizer ti Baguio Fishing Tournament. Iti pannakaiuman ti Bombo Radyo kenni Serrano, mangnamnama daytoy nga ad-adu pay ti dumar-ay iti nasao a torneo gaputa naobserbaranna nga umad-adu dagiti maad-addaan iti interes iti daytoy. Sigun kenni Serrano, awan ti nagbaliwan dagiti pagalagadan iti nasao a pasalip nu sadino, agtalinaed a kangrunaan iti daytoy ti saan a panagkusit wenno panagsaor ken agitugot iti bukod a fishing equipments. Inlawlawag ti nasao nga organizer a nu awan ti bukod a fishing equipments ket adda met ti maipabulod kadagiti participants. Innayon pay ni Serrano nga aggigiddan ti panagbanni-it dagiti amin a participants iti las-ud ti tallo nga oras manipud alas siete ti agsapa wenno alas otso ti agsapa inton Pebrero 15. Malaksid kadagiti natataengan, mabalin a makipaset ditoy dagiti agtawen iti sangapulo nga agpababa la ketdi kadwaen dagiti guardians. Makaawat iti cash prize ken trophy dagiti makabanni-it iti ado ken dakkel nga ikan. Mabalin pay nga iyawid dagiti participants dagiti mabanni-itda nga ikan agsipud ta nay a masida. Sumagmamano kadagiti ikan a mabalin a mabanni-it iti burnham park ket ti Tilapia, Igat (Eel), Hipon, ken dadduma pay
