Mabalballaagan ti publiko a liklikan ti panaglangoy kadagiti creeks, ken canals partikular tatta a panagtutudo tapno maliklikan ti aniaman nga insidente.
Kasaruno daytoy ti napasamak nga insidente iti 16-anyos a lalaki a mapapati a nalmes idiay Mamaga, Balili, La Trinidad, Benguet.
Maipalagip nga immunan a naireport kadagiti otoridad ti mapapati nga insidente ti pannakalmes idi pay Setyembre a uno, pasado alas kwatro ti malem.
Nupay kasta, saan a nalawag ti salaysay dagiti innem a kakadwa ti biktima nu anya ti husto a napasamak gapu ta saan nga agtutunos ti ibagbaga dagitoy.
Ibagbaga dagiti dadduma a limmagto wenno nagdive ti biktima tapno aglangoy bayat a saan met a maibaga dagiti dadduma nu kasano a napasamak agsipud ta maatap a nakainom dagitoy idi napasamak ti insidente.
Naammoan iti imbestigasyon a nag-iinom ti biktima ken dagiti kakadwana kas panangrambak iti panagkasangay ti maysa a kadwada.
Iti agdama, temporaryo paylaeng a naisardeng ti panangsapul no sadino maituloy manen daytoy inton bigat.
