Mabalballaagan ti publiko nangruna dagiti motorista a lumablabas iti Half Tunnel sadiay Km.46, Paoay, Atok, Benguet a saanda a basta basta agisbo iti nasao a tourist destination.
Daytoy ket kalpasan a napaliiw a dagiti motorista nga agsarsardeng iti Half Tunnel, mapalocal wenno turista ket agis-isbo iti daytoy rason nga umang-angot daytoy.
Adda met ti comfort room iti nasao a lugar a mabalin a maaramat nu pay kasta kasapulan laeng nga agbayad para iti maintenancena.
Ti Half Tunnel ket maysa kadagiti tourist spot iti munisipyo ti Atok rason a rumbeng a mapagtalinaed ti kinapintas ken kinadalus daytoy tapno maallukoy pay dagiti daduma a turista ken tattao nga agbisita.
Gapu iti dayta, makidkiddaw ti disiplina ken kooperasyon ti tunggal maysa tapno agtalinaed ti Half Tunnel kas maysa a destinasyon iti nasao a munisipyo.
