Guyguyuguyen ti Bureau of Jail Management and Penology- Baguio City Jail Female Dormitory ti publiko a gumatang ti nagkakapintas a bag nga aramid dagiti Persons Deprived of Liberty (PDL).
Dagiti bag ket naaramid iti beads ken bayong.
Ti panagaramid dagiti bag ket paset ti programa ti BJMP- Baguio City Female Dormitory a livelihood program tapno masuportaran ti inaldaw a kasapulanda iti uneg ti pagbaludan ken kasta met a tulongda kadagiti pamiliada iti ruar ti nasao a pagbaludan.
Sigun kenni Jail Officer 1 Priszalia M. Manengyao, dagiti maar-aramid a bag ket saan laeng a para kadagiti babbai nu diket adda metlaeng ti para kadagiti lallaki.
Inlawlawagna a mabalin ti agpa-“costumize” wenno agpaaramid ti bag depende iti itsura a kayat ti gumatang ken “pre-order” a bag.
Impasiguradona a de kalidad dagiti bag a maar-aramid ken adda a napintas dagitoy.
Kabayatanna, pinagyamananna dagiti amin a gimmatang iti umuna a panangiyuswatda iti live selling dagitoy idi kalman nangruna dagiti indibidual idiay Ilocos, Batangas, Mt. Province, Kalinga ken dadduma pay a lugar gaputa nakaurnongda ti agarup P30,000.
Amin dagiti nakolektarda ket mapan kadagiti PDL a nagaramid ti bag.
Kabayatanna, dagiti bag a mabalin a magatang ket agay-ayam ti agingga lima gasut agingga lima gasut ken lima pulo para iti small beads bag; innem a gasut agingga walo gasut para iti medium beads bag; ken siam a gasut agingga sangaribo ken lima gasut para iti large beads bag bayat a dagiti bayong met ket agay-ayam iti tallo gasut agingga uppat a gasut ti small ken medium a bayong bags ken uppat a gasut ken lima pulo agingga innem a gasut ken lima pulo a gasut para iti large bayong bags.
Iti sabali a bangir, ngimmato ti bilang dagiti babbai a naibalud gapu iti nagduduma a krimen nga inaramidda.
Maibasar iti datos ti nasao nga opisina, innem a pulo ket dua ti naibalud, nangatngato ngem ti lima pulo ket uppat idi napalabas a bulan.
Dagiti kangrunaan a krimen nga inaramid dagitoy ket ti panagaramat ti iligal a droga, simmaruno ti estafa, “mutilation”, ken dadduma pay.
