Guyguygoyen ti City Environment and Parks Management Office (CEPMO) ti publiko a makipaset iti maisayangkat a panagkolekta ti used cooking oil inton November 22, 2026.
Sigun kenni Engr. Marivic Empizo, Assistant City Environment and Parks Management Officer, mabalin a mangkolekta dagiti households ken small establishments kadagiti nausarda nga cooking oil, ikabilda dagitoy kadagiti cans wenno bottles, ken iturongda kadagiti babbarangayda para iti pannakaurnong dagitoy.
Adda met dagiti drum nga impaay ti CEPMO para kadagiti barangay a kayat a makipaset iti nasao a programa tapno nalaklaka ken nasayaat ti pannakaurnong dagiti used cooking oil.
Maisayangkat ti programa idiay Malcolm Square, no sadino panggep ti CEPMO a makakolekta iti 10 tons a naaramat a cooking oil. Kalpasan ti panagkolekta, alaen dagiti DENR haulers dagiti naurnong nga oil ken iturongda dagitoy iti treatment facility para iti umno a pannakaproseso daytoy.
Maproseso dagiti makolektar nga used cooking oil tapno mausar a kas aviation fuel.
Dagiti makolektar nga used cooking oil ket gatangen dagiti contractors iti presio a P5 tunggal litro. Babaen iti daytoy, saan laeng a makatulong dagiti makipaset iti panangsalimetmet iti aglawlaw, no di ket mabalin pay a makaala iti gatad iti naaramatda a mantika.
Malaksid iti dayta, maliklikan ti panangibelleng kadagiti used cooking oil kadagiti kanal ken drainage a mabalin a mangpataud iti polusyon ken makadadael iti aglawlaw.
Ginuyugoy pay ni Empizo ti publiko a makipaset iti programa babaen iti panangurnong ken panangisina kadagiti naaramarda a mantika imbes a ibukbok dagitoy kadagiti lababo wenno kanal.
Impalagipna a ti umno a pannakaibelleng dagiti used cooking oil ket maysa a simple ngem napateg a wagas tapno makatulong dagiti residente iti panangsalimetmet iti kinadalus ti komunidad ken pannakaprotektar iti aglawlaw.// via Bombo Khey Reparip
